आगो बल्दैछ

- स्व बिमल गुरुङ

केटाहरुको
भेलाबाट निर्णय भयो
आगो बाल्ने
भरै खाइसकेपछि खाना ।

आगो बल्दैछ
पात पतिंगरहरु जल्दैछन्
काठहरु बल्दैछन्
खसेलाहरु जल्दैछन्
आगो बल्दैछ ।

रहर छ
आगो ताप्ने मलाई पनि
यो हुस्सु परेको रातमा ।

आगो बल्दैछ
अवरोधहरुको फलामको सत्ता गल्दैछ
हामीलाई
बाटोमा
राम्ररी हिंड्न नदिने
काँडाहरु जल्दैछन्
कोइला हुँदैछन्
खरानी हुँदैछन्
आगो बल्दैछन् ।

कहिं जाँदा पनि
हामीलाई शान्ति छैन
कोठा जाँदा पनि शान्ति छैन
कौसीमा
सडक । रिक्सा । साइकल । मोटर
मान्छेहरु र
काठका पोशाक लगाएका घरहरु हेर्दा पनि शान्ति छैन
सिमेण्ट पोशाक लगाएका घरहरु हेर्दा पनि शान्ति छैन
केहि गर्दा पनि शान्ति छैन
कतै जाँदा पनि शान्ति छैन
हुस्सु-हुस्सु छ चरैतिर
ठण्डा-ठण्डा छ चारै-चारैतिर ।

हुनसक्छ
यसैले केटाहरुको
भेलाबाट निर्णय भयो
आगो बाल्ने
भरे खाइसकेपछि खाना ।

आगो बल्दैछ
साइकलको पुरानो टायर जल्दैछ
खुब मजाले
हवार-हवार जल्दैछ
साइकलको
डेट-अफ ट्युबहरु जल्दैछन्
छेस्का-छेस्कीहरु बल्दैछन्
मकैका खोयाहरु जल्दैछन्
प्लास्टिकहरु बल्दैछन्
ढुंगाहरु काला हुंदैछन्
माटोहरु डढ्दैछन्
वातावरण तापमय हुँदैछन्
फलामका वीर धुँवाहरु नक्षत्रतिर जाँदैन
हुस्सु भयभित हुँदैछ
आगो बल्दैछ ।

(०४६/९/२०)

No comments:

Post a Comment